طريقة عمل الكوكيزالهشة بقطع الشوكولا

اسم الكوكيز دائما يذكرني بدرس الانكليزي ايام الثانوية ..

دائما اقرة كلمة كوكيز واشوف صورتة بالكتاب بس ما اتخيل شنو هو طعمة. من يوم ما اجيت على امريكا بسنة ٢٠١٤ وجربت الكوكيز لاول مرة .. صرت مدمنة. وبصراحة صرت مو اي وحدة احبهه .. لازم تكون طرية بس مقرمشة من برة .. لازم لونها يكون

ذهبي ومليانة بالشوكولا الي تنطيهه طعمهه المميز.

صحيح اني دائما احب الطبخ والخبز بس اني اعترف دائما اني فاشلة بخبز الكوكيز .. زين ليش ؟

اغلب الاحيان تطلع الكوكي يابسة .. محروقة .. ذبلانة .. كلش طرية .. الخ

يعني باختصار شديد .. ما ضبطت ابدا..

اتذكر اول مرة سويت الكوكيز كانت قبل ٣ سنوات لمن ردت اكل كوكيز صحية .. سويتهه بالشوفان والموز فقط؟ اي موز وشوفان بس .. وطبعا بدون ما اشرح ممكن تتخيلون انه طعمهه كان مرعب ..

موز محروك ومرشوش عليه شوفان ما مطبوخ زين .. يمكن من اكثر الاشياء المقرفة الي اكلتهه بحياتي والحمدلله لحد هسه ما عدت هاي التجربة..

ملاحظات

١. المقادير لازم تكون مضبوطة بالكوب وافضل نستعمل اكواب القياس المخصصة

هاي الاكواب تمنع اي خربطة بالقياس وتخلي الوصفة مضبوطة

٢. الزبدة لازم تكون بحرارة الغرفة حتى تنطي الهشاشة المناسبة

٣. مراقبة الكوكيز خلال فترة الشوي. معدل شوي الكوكيز يكون ٨-١٢ دقيقة. يفضل انه نبقى بصفهم الى ان يصير لونهم هو اللون المطلوب (ذهبي الى بني فاتح من جميع الجهات)

٤. استعمال مكونات جيدة ونبتعد عن الاشياء الرخيصة. الطحين، السكر او الشوكولا الرخيصة تخرب الوصفات دائما. اولا تغير

من الطعم وثانيا تغير من القوام مال الوصفة

٥. ما نخلط العجينة لمدة طويلة لان رح تتحول الى عجينة قاسية وتروح الهشاشة الي نحاول نحافظ عليهه دائما بالكوكيز

اخيرا وصلنة للمكونات

---

المقادير:

١/٢ كوب زبدة غير محلاة بحرار الغرفة

١/٢ كوب سكر بني فاتح

١/٢ كوب سكر عادي

١ بيضة

١ ملعقة طعام فانيلا

١ و١/٤ كوب طحين ابيض متعدد الاستعمالات

١ ملعقة نشاء الذرة

١/٢ ملعقة شاي بيكاربونات الصوديوم

١/٢ ملعقة شاي ملح

١ و١/٢ قطع الشوكولا

---

الطريقة :

١. نخلط الزبدة مع السكر البني والسكر الابيض لحد ميتحول لونهه الى ابيض فاتح وتصير كريمية

٢. بمكان ثاني , ننخل الطحين, النشاء , الملح وبيكاربونات الصوديوم مع بعض حتى نتخلص من كتل ناشفة

٣. على خليط الزبدة والسكر نضيف البيضة والفانيلا واخر شي المكونات الناشفة والشوكولا

٤. بصينية كبيرة , نفرش ورق الزبدة. نبدي نكون كرات صغيرة من العجينة باستخدام ملعقة اكل او ملعقة الايس كريم حتى يكون عدنة طوبات متساوية بالحجم. نحط الكرات بالصينية ونخلي بالبراد لمدة ساعة كاملة

٥. قبل ربع ساعة من الشوي, نحمي الفرن على درجة حرارة ٢٢٠ , ونحضر صينيات للخبز. الصينيات تكون مغلفة بورق الخبز او البارشيمنت حتى نضمن نتيجة مضبوطة. نصف الكوكيز بالصينية مع ترك مسافة ٣ سم من جميع الجهات المحيطة بالطوبة لانها رح تنفرش لما تنخبز وتاخذ مساحة كبيرة

٦. تخبز لمدة ١٠ الى ١٢ بس نراقب دائما لان الكوكيز تكون حساسة وممكن حرارة الفرن تختلف من فرن لثاني وتسبب تغيير بوقت الشوي.

٧. ورة ما نطلعهم من الفرن لازم , لازم , لازم نتركهم يبردون على الاقل لمدة عشر دقايق حتى يجمدون بداخلهم

٨. تتخزت بمكان بارد وجاف

وعليكم بالعافية