وصفة البروتين بارز الصحية

اني صحيح اكلي مو صحي ١٠٠٪؜ بس دائما احاول ابتعد عن السكريات الزايدة وعن السناكات المصنعة لان ادري يحطون مواد حافظة بيهه .

اول شي شنو المواد الحافظة، المواد الحافظة الطبيعية هي السكر والملح والليمون، بس بالمصانع الكبيرة هاي المواد الطبيعية غالية وتاخر العمل واصلا ما تحفظ الاكل لمدة طويلة. لذلك نشوف الاكل المعلب يبقة لمدة طويلة، شهور وسنين ونرجع على المعلبات ونلكاهه ما تغيرت.

مواد الحفظ المستعملة من المصانع هي مواد كيميائية تحفظ اللون والطعم.

المواد الحافظة الكيميائية بيهه اخطار هوىاية منها الخطر بالاصابة بالسرطان، امراض القلب والحركة الزايدة عند الاطفال.

بدون ما ازود بالكلام .. هاي الوصفة سهلة جدا وممكن تسووهه بعشر دقايق بس اهم شي المكونات تكون جاهزة عدكم ..

بالنسبة الية الوصفة ارخص بهواية من ان اشتري البروتين بارز كل يوم لمن اكون بالكلية ..

يومي بالكلية طويل دائما لان اطلع من الصبح لليل ولازم يكون وياية سناك واحاول اخذ سناك صحي ..

اخيرا وصلت لهاي الوصفة وحبيت اشاركهه وياكم ..

---

المقادير :

١ و١/٢ كوب شوفان مطحون (شوفان عادي مطحون)

١ كوب باودر زبدة الفول السوداني

١/٤ كوب عسل

٢ ملعقة طعام ستيفيا او محلي طبيعي

١/٤ كوب حليب لوز

رشة ملح

٢ ملعقة من البروتين المفضل عدكم

---

الطريقة :

١. نخلط المواد جافة مع بعض حتى يتجانسون

٢. نضيف العسل ونخلطة مع المكونات

٣. نضيف حليب اللوز ونخلطة باليد حتى يتجانس ويصير قوام مناسب يستحمل انه يتكون باشكال

٤. بصينية نفرش الخلطة على شكل مربع ونقطعها على القياس المرغوب

٥. اخر اضافة هي رشة زبدة الفول السوداني على الوجه ، وهاي الخطوة حسب الرغب بس تنطيهه طعم طيب

ملاحظات:

١. باودر زبدة الفول السوداني هو من نفسة زبدة الفول السوداني

الباودر يكون اخف بالطعم وبالسعرات الحرارية . اني بالنسبة الي استعملت هاي الماركة

٢. النستلة لازم تنحفظ بمكان جاف وممكن تبقة مدة

٣. اضافة حليب اللوز تكون تدريجية. ممكن نحتاج اكثر او اقل من الكمية المكتوبة حسب نوعية الشوفان والبروتين الي مستخدميه . المهم نحصل على قوام قوي ممكن يصير شكل نستلة وما يتفتت

٤. ممكن استبدال حليب الوز بالحليب العادي

٥. ممكن نبدل المحلي او الستيفيا بعسل

الوصفة سهلة وسريعة واكيد رح تحبوهه

#protein #bars #healthy #easy #lifestyle