وصفة كوكيز الميرانگ

اليوم الوصفة سريعة وخفيفة وممتعة بالعمل لان نكدر نلعب بالالوان الي نستخدمهه و بالاطعمة الي نستخدمهه

اول مرتين سويت الميرانگ ما ضبطت وياية وتعقدت منهه وظليت شهور ابتعد عنهه بس بعدين رجعتلهه بعد ما اتعلمت خطوتين ضروريات

١. الادوات المستعمله بالخلط مثل الخلاط والوعاء مال الخلط لازم يكونون نظيفين وناشفين تماما. اي اوساخ ممكن تسبب بهبوط بياض البيض عند الخلط

٢. الميرانك يحب ينشوي على مدة طوويلة .. صبور كلش ويحب يتدلل بالفرن فلازم احنة نكون صبورين وياه وننطيه الوقت الكافي حتى ينطينة طعم مميز والقرمشة الي موجودة بالميرانك

---

المقادير:

٣ بياض بيض

٢\٣ كوب سكر

١\٤ ملعقة صغيرة كريم التارتار

---

الطريقة :

١. يخلط البيض بالخلاط الكهربائي في وعاء نظيف لمدة دقيقتين حتى يتحول الملس من بياض البيض الى ابيض قطني

٢. بعد ما يوصل البيض للمرحلة الموضحة بالصورة, نبلش نضيف السكر بالتدريج حتى يكون عدنة قوام مضبوط ونخلط بنفس الوقت لحد ما يوصل بياض البيض الى مرحلة متماسكة اكثر (مثل ما موضح بالصورة) . هذي الخطوة اهم خطوة

٣. بعد ما تماسكت الخلطة نكدر نتحكم بالطعم واللون الي نريدة. اني قسمتهه الى ٣ اقسام واستعملت طعم الخوخ والتوت والفانيلا وطبعا الطعم حسب الرغبة. بعدها لونت كل طعم بلون شكل

٤. نحط الخلطة بكيس المخبوزات مع يكون مثبت بيه القمع الخاص بشكل الوردة

٥. بعد تكوين الاشكال, يخبز الميرانك بالفرن لمدة ساعة ونص الي ساعتين مع المراقبة على اقل حرارة للفرن الخاص بيكم. بين ال١١٠ و١٢٠ درجة يكون ممتاز . بعد الخبز نتركة حتى يبرد وبالعافية