طريقة عمل ايس كريم كريمي بالمنزل

باردة او حارة الدنيا, يبقى الايس كريم دائما من الاكلات المفضلة عدنة

هالمرة حاولت اسوي وصفة سهلة تعوض عن الايس كريم الي نشتريه من برة وما نعرف شنو مكوناته اصلا

الايس كريم يحتاج خلط مستمر مع برودة حتى ينطينة القوام الكريمي المميز مالتة ولهالسبب اكو مكينة خاصة بيه بس بالعادة اغلب الناس ما يشترون هالمكينة لان استعمالهه قليلة

الوصفة يحتاجلهه صبر بس وعد حتكون طيبة وتستاهل

الملاحظات

١. نحاول نغطي الوعاء بشكل جيد حتى لا يتعرض لريحة وياثر على طعمة

٢. استعمال الحليب كامل الدسم ياثر جدا على طعم الايس كريم لاننا استغنينا عن كريمة الخفق

٣. يفضل نبلش بيها من الصبح في يوم نكون متواجدين بالبيت اليوم كلة حتى لا تخرب وتتحول الى ثلج مجمد

---

المقادير

علبة حليب مكثف \او ٤٠٠ غرام

نص علبة حليب مبخر (حليب ابو قوس) \او ٢٠٠ غرام

٢ ملعقة حليب باودر

١ كوب حليب كامل الدسم

فانيلا

---

الطريقة

تخلط جميع المكونات مع بعض لمدة ثلاث الى اربع دقائق بالخلاط الكهربائي . نحطها في وعاء عميق مثل الموضح بالصورة حتى يسهل علينا الخطوات الي بعدها .

ننقلها على الفريزر لمدة ساعة ونخلطها مرة ثانية. تكرر الخطوة ٧ مرات كل ساعة او ساعة ونصف . ننقل الايس كريم الى مكان ثاني يكون مسطح حتى يتجمد بشكل متساوي. نبقيه بالفريزر لمدة ليلة كاملة . تقدم مع الفواكه وبالعافية